Боов чулуу

Мэлхийт толгойн нууц: "Арга Билгийн Дом" ба Боов чулуу

Эрдэнэзуу хийдийн баруун урд байрлах Мэлхийт толгой уулын зүүн талын "Маамуу толгой" хэмээх жалганд Хархорины хамгийн сонирхолтой, нууцлаг нэгэн дурсгал оршдог. Нутгийнхан үүнийг "Боов чулуу" хэмээн нэрийддэг билээ.

📜 Сүм хийдийн сахил санваарыг хамгаалсан домог: Эрт урьд цагт Эрдэнэзуу хийдийн Бор хонхорт шавилан сууж байсан залуу лам хуврагууд сахил санваараа умартан, Маамуу толгойн харчуулын хороолол руу сэм гүйх болжээ. Үүнийг мэдсэн Цорж ламтан ихэс ламд айлтгахад, тэрээр 108 суваргаа тойруулан уулыг ажиглаад: “Энэ уулын аманд эм савдаг амьдардаг юм байна, аргагүй ээ” хэмээжээ. Ингээд толгойн оройд "УМ" үсэг сийлж, жалганд нь эр хүний эрхтнийг чулуугаар урлан тавьж, Арга Билгийн дом шившлэг хийн тахиснаас хойш залуу лам нар ламын эрдэмдээ шамдах болсон түүхтэй.

✨ Өнөө цагт: Заяаны хань, үр хүүхэд гуйх шүтээн Эдүгээ энэ цэг нь зөвхөн сонирхох үзвэр биш, үр хүүхэд тогтдоггүй гэр бүлүүд, хань заяагаа хайсан бүсгүйчүүдийн ирж мөргөдөг залбирлын газар болжээ. Харийн орны жуулчин бүсгүйчүүд хүртэл энэ түүхийг сонсоод хүслээ даатгаж, хожим хүсэл нь биелэн баярлаж талархсанаа илэрхийлэн дахин ирдэг хэмээн нутгийнхан хуучилдаг.